Avropa Şurası Parlament Asambleyasının (AŞPA) yaz sessiyasının ilk günündə qurumun sədri Jan-Klod Minyon mətbuat konfransı keçirmişdir.
AŞPA-nın Dağlıq Qarabağ üzrə alt komitəsinin yenidən formalaşdırılması və gələcək fəaliyyəti ilə bağlı APA -nın Avropa bürosu əməkdaşının sualına cavab verən AŞPA sədri, bu məsələ ilə bağlı qurumun bürosunun hələ yeni qərar qəbul etmədiyini bildirmişdir:"Bu komitənin bərpası ilə bağlı vəziyyət hələ dəyişməyib və irəliləyiş yoxdur. Bu məsələ ilə bağlı büroda müzakirələr aparılmadı, mən özüm də hələlik hər hansı qərar qəbul etməmişəm. Yalnız onu deyə bilirəm ki, Azərbaycan və Ermənistanın AŞPA-dakı nümayəndə heyətlərinin rəhbərləri ilə görüşmək niyyətim var və bu mənim öz təşəbbüsümdür. Bu görüşlər ərzində biz bu komitənin gələcək taleyini hərtərəfli şəkildə müzakirə edəcəyik".
AŞPA sədri Ermənistanda keçiriləcək parlament seçkiləri ilə əlaqədar Ermənistan nümayəndə heyətinin yaz sessiyasında iştirak etmədiyini, odur ki, bu sessiya ərzində görüşə bilməsə də, iyun sessiyasında nümayəndə heyətlərinin rəhbərləri ilə bu məsələ ilə bağlı mütləq görüşlər keçirəcəyini vurğulamışdır.
Bundan başqa, AŞPA sədri qısa zamanda ATƏT-in Minsk qrupunun bəzi diplomatları, əsasən də fransalı həmsədrlə görüşmək niyyətində olduğunu demişdir: "Bu görüşlərdə Dağlıq Qarabağla bağlı son durumu müzakirə edəcəyik".