Azərbaycanın BMT yanında daimi nümayəndəliyi özünü qondarma "Dağlıq Qarabağ Respublikasının baş naziri" kimi təqdim edən Ara Arutunyanın guya 2009-cu ilin noyabrın 18-də BMT-nin binasına daxil olması və orada rəsmi görüşlər keçirməsi barədə bir müddət əvvəl erməni KİV-lərində yayılmış məlumatla əlaqədar araşdırmalar aparmışdır.
Azərbaycanın Xarici İşlər Nazirliyindən bildirmişlər ki, daimi nümayəndəliyimiz BMT-nin müvafiq qurumlarından məsələ ilə bağlı rəsmi məlumat əldə etmişdir.
Araşdırmalar nəticəsində məlum olmuşdur ki, Ara Arutunyan adlı şəxsə BMT-nin binasına müvafiq qurumlar tərəfindən heç bir buraxılış sənədi verilməmişdir. Bu şəxs heç bir iclasda iştirak etməmiş və onunla heç bir rəsmi görüş keçirilməmişdir.
BMT-nin binasının bir hissəsi turistlər üçün açıq olduğundan, A.Arutunyanın Ermənistan vətəndaşı sənədi ilə adi turist və ya tələbə kimi binaya daxil olması isə istisna olunmamışdır. Bununla da, erməni KİV-lərində yayılmış məlumatın uydurma olması müəyyən edilmişdir.
AzərTAc