"Avropa Birliyinə daxil olan ölkələrin səfirləri ilə İctimai Palatanın görüşmək niyyəti onların hüququdur. Lakin Avropa ölkələrinin səfirləri bundan sonra onlarla hansı üzlə görüşəcək, bu mənə aydın deyil". 
Bu açıqlamanı APA -ya Yeni Azərbaycan Partiyası (YAP) icra katibinin müavini Siyavuş Novruzov vermişdir. O bildirmişdir ki, İctimai Palata bir neçə dəfə Avropa Birliyinə daxil olan ölkələrin Azərbaycandakı səfirləri ilə görüş təşəbbüsü ilə çıxış etmişdir: "Ötən il keçirdikləri görüşdə hansı məsələlərin müzakirə olunduğuna dair stenoqram var. Onların birinci tələbi puldur. Səfirlərin biri demişdir ki, mitinqə kifayət qədər adam çıxarmasanız, maddi və mənəvi dəstək verməyəcəyik. Hətta səfirlərdən biri müxalifətçilərin aksiyada iştirak edənlərin sayı ilə bağlı məlumatının yalan olduğunu da bildirmişdir".
S. Novruzov qeyd etmişdir ki, müxalifətin aksiyaları mövsümi xarakter daşıyır: "Müxalifət partiyalarının, bu qurumlara yaxın olan gənclər təşkilatlarının aksiyalarının səviyyəsini gördük. Bu fikrimin üzərində qalıram. Müxalifət partiyalarının heç birinin sosial bazası, o cümlədən cəmiyyətə verə biləcəyi ideyası yoxdur. 1990-cı il təfəkküründən bu yana keçə bilməyən, ancaq mitinq düşüncəsi ilə yaşayan insanlardan xalq da heç nə gözləmir".