Azərbaycanın Avropa Şurası çərçivəsində artan nüfuzunun daha bir ifadəsi bu qurumdakı nümayəndə heyətimizin üzvlərinə mühüm məsələlərlə bağlı məruzələrin etibar edilməsidir.
Milli Məclisin deputatı Rafael Hüseynov bu baxımdan xüsusilə fərqlənir. İndiyədək ona üzvü olduğu 3 komitənin xətti ilə 4 məruzə hazırlamaq həvalə edilmişdir. Deputatımız Mədəniyyət, elm və təhsil komitəsi üzrə 2, Hüquqi işlər və insan hüquqları, eləcə də Ətraf mühit, kənd təsərrüfatı, yerli və regional işlər komitələrinin hər birinin xətti ilə 2 məruzə hazırlamışdır.
Ətraf mühit, kənd təsərrüfatı, yerli və regional işlər komitəsinin mayın 28-də Parlament Assambleyasının Paris ofisində keçirilən toplantısında R.Hüseynova yeni bir məruzəni hazırlamaq tapşırılmışdır. Bu məruzə "Hərbi münaqişələr və ətraf mühit adlanır". Mövzu bütün Avropada problemin araşdırılmasını tələb edir və deputatımız həmin kontekstdə Ermənistanın Azərbaycana qarşı təcavüzünün ölkəmizin ekologiyasına vurduğu ziyandan da geniş bəhs etmək niyyətindədir.
Ötən illərdə AŞPA-da bu məsələlərlə əlaqədar bir neçə tövsiyə üçün təklif və qətnamə təqdim etmiş azərbaycanlı deputat problemin təfərrüatına kifayət qədər yaxşı bələddir.
Hazırlanacaq məruzə ilə əlaqədar R.Hüseynov Avropa Şurasına daxil olan ölkələrdəki münaqişə bölgələrinə səfərlər edəcəkdir.

Əsgər ƏLİYEV AzərTAc-ın xüsusi müxbiri
Paris