Mayın 31-də Azərbaycanın xarici işlər naziri Elmar Məmmədyarov ölkəmizdə səfərdə olan ABŞ-ın müdafiə nazirinin Rusiya, Ukrayna və Avrasiya üzrə köməkçisinin müavini xanım Selest Uolander ilə görüşmüşdür.
Xarici İşlər Nazirliyindən bildirmişlər ki, S.Uolander Azərbaycanın beynəlxalq antiterror əməliyyatlarına verdiyi töhfəsinin, habelə Əfqanıstanda sülhün və sabitliyin təmin olunması istiqamətində dəstəyinin ABŞ tərəfindən yüksək qiymətləndirildiyini vurğulamış və bu əməkdaşlığın genişləndirilməsinin vacibliyini bildirmişdir.
E.Məmmədyarov Azərbaycanın ABŞ ilə müxtəlif sahələrdə sıx əməkdaşlıq etdiyini qeyd etmişdir.
Nazir ölkəmizin Əfqanıstanda yalnız təhlükəsizlik sahəsinə deyil, həmçinin, humanitar, təhsil və əhalinin normal şəraitdə yaşamasına zəmin yaradan digər sahələrdə də töhfə verdiyini bildirmişdir.
Görüşdə birgə maraq doğuran ikitərəfli, regional və qlobal məsələlər ətrafında fikir mübadiləsi aparılmışdır.{nl}