"Avropa Birliyi Dağlıq Qarabağ münaqişəsinin nizamlanması məsələsində Azərbaycan və Ermənistana dəstək verilməsində daha güclü rol oynamaq istəyərdi. Bu münaqişə çox mürəkkəbdir və onu həll etmək zəruridir".
APA-nın məlumatına görə, bu bəyanatla Avropa Birliyinin xarici işlər və təhlükəsizlik siyasəti üzrə Ali Nümayəndəsi Ketrin Eşton Brüsseldə Avropa Birliyi Şurasının iclasında çıxış etmişdir.
Ketrin Eşton qeyd etmişdir ki, iclasda Cənubi Qafqazda və ayrı-ayrılıqda Azərbaycan, Ermənistan və Gürcüstanda durum müzakirə olunacaq: "Cənubi Qafqazla bağlı müzakirələrin əsas mövzularından biri Dağlıq Qarabağ münaqişəsi olacaq. Biz Avropa Birliyinin bu münaqişənin nizamlanmasında hansı işlər görə biləcəyini müzakirə edəcəyik".
Avropa Birliyi münaqişənin nizamlanmasında rəsmi vasitəçi olmasa da, Filipp Lefortu Cənubi Qafqaz və Gürcüstanda böhranlar üzrə xüsusi nümayəndə təyin etmişdir.