Fevralın 8-də Azərbaycan Respublikasının Prezidenti yanında Strateji Araşdırmalar Mərkəzində (SAM) Fransa-Qafqaz dostluq qrupunun sədr müavini, Fransa-Azərbaycan işçi qrupunun rəhbəri senator xanım Natali Qulenin başçılıq etdiyi parlament nümayəndə heyəti ilə görüş olmuşdur.
Qonaqları salamlayan SAM-ın direktor müavini Gülşən Paşayeva səfərin əhəmiyyətindən danışmış, bu görüşün ikitərəfli əlaqələrin daha da inkişaf etdirilməsində mühüm rol oynayacağını demişdir. SAM-ın direktor müavini təmsil etdiyi qurumun həyata keçirdiyi tədbirlər, gördüyü işlər barədə qonaqlara ətraflı məlumat vermişdir.
Səmimi görüş üçün təşəkkürünü bildirən xanım Natali Qule, Azərbaycanda səfərdə olmasından məmnunluq ifadə etmişdir. Ölkəmiz ilə daimi və etibarlı dostluq münasibətlərində olduqlarını vurğulayan N.Qule bu əlaqələrin bundan sonra da davam etdiriləcəyinə əminliyini bildirmişdir.
N.Qule səfər çərçivəsində bir sıra rəsmi görüşlərin keçirildiyini, həmçinin məcburi köçkünlərin məskunlaşdıqları məntəqəyə baş çəkdiklərini bildirmişdir. Senator qaçqın və məcburi köçkünlərin tezliklə doğma torpaqlarına qayıdacaqlarına inandığını vurğulamış, Fransa ictimaiyyətinə onların vəziyyəti haqqında məlumat verəcəklərini demişdir.

AzərTAc