"Rumıniyanın Qafqaz və Mərkəzi Asiya ölkələri, xüsusən Azərbaycan, Türkmənistan və Qazaxıstanla münasibətləri böyük iqtisadi əməkdaşlıq potensialına malikdir".
"APA-ECONOMICS"in xəbərinə görə, bu sözləri Rumıniya prezidenti Trayan Basesku ölkədə akkreditə olunmuş diplomatik missiya rəhbərləri ilə illik görüşündə demişdir.
O, Rumıniyanın milli təhlükəsizliyin prioritet vəzifəsi hesab etdiyi enerji təhlükəsizliyinin təmin olunmasında adıçəkilən ölkələrin mühüm rola malik olduğunu vurğulamışdır. Prezident bu baxımdan AGRI (Azerbaijan-Georgia-Romania Interconnector) layihəsinin reallaşmasının Rumıniya üçün əhəmiyyətini yüksək dəyərləndirmişdir.
Xatırladaq ki, ötən il 13 aprel 2010-cu ildə Buxarestdə Rumıniya, Azərbaycan və Gürcüstan arasında AGRI layihəsinin reallaşması ilə bağlı anlaşma memorandumu imzalanmışdır. Sentyabrın 14-də isə Azərbaycan, Gürcüstan, Macarıstan və Rumıniya AGRI layihəsi üzrə Bakı Bəyannaməsini imzalamışlar. Layihə Azərbaycanın təbii qazının boru xətləri vasitəsilə Gürcüstanın Qara dəniz sahillərinə nəql olunması, burada xüsusi terminalda mayeləşdirilərək, Qara dəniz vasitəsilə tankerlə Rumıniyanın Konstansa limanındakı terminala çatdırılması, daha sonra isə yenidən təbii qaz şəklində bu ölkənin ərazisində mövcud olan qaz infrastrukturu şəbəkəsi vasitəsilə Rumıniyanın və digər Avropa ölkələrinin tələbatlarının ödənilməsini nəzərdə tutur.
İlkin hesablamalara görə, AGRI layihəsinin icrasına 1,2-4,5 milyard avro tələb olunacaq. Vəsaitin dəqiq həcmi isə tikiləcək terminalların illik gücündən (2-8 milyard kubmetr) asılı olacaq. Layihənin təxminən 2 il ərzində reallaşması nəzərdə tutulur. İlkin mərhələdə AGRI vasitəsilə ildə 8 milyard kubmetr, gələcəkdə isə 20 milyard kubmetr qazın nəqli planlaşdırılır.
Macarıstan da layihəyə qoşulmaq niyyətində olduğunu açıqlamışdır