Koreya Respublikası Milli Assambleyasının sədri Pak Hi Te yanvarın 12-də Azərbaycana rəsmi səfərə gəlmişdir.
Heydər Əliyev Beynəlxalq Aeroportunda qonağı Milli Məclis sədinin müavini Bahar Muradova və digər rəsmi şəxslər qarşılamışlar.
Pak Hi Te hava limanında jurnalistlərə bildirmişdir ki, Koreya Respublikası Milli Assambleyasının sədri kimi Azərbaycana ilk dəfədir gəlirəm. Bu il Azərbaycan ilə Koreya arasında diplomatik münasibətlərin qurulmasının 20 ili tamam olur. Səfərimin məqsədi bu yubileyi qeyd etmək və münasibətlərimizi daha da inkişaf etdirmək üçün məsləhətləşmələr aparmaqdır.
Pak Hi Te demişdir: "Fikrimcə biz eyni köklərə malik xalqlarıq. Necə ki, siz Türkiyəni qardaş bir ölkə kimi qəbul edirsiniz. Biz də Türkiyəni qardaş ölkə kimi qəbul edirik. Bu isə həm də onu göstərir ki, biz özümüz də qardaş ölkələrik. Azərbaycanın zəngin təbii ehtiyatları, Koreyanın müəyyən iqtisadi nailiyyətləri vardır. Ümid edirik ki, bizim əlaqələrimiz, ikitərəfli münasibətlərimiz daha da genişlənəcəkdir".
Qonaq ölkəmizə rəsmi səfəri çərçivəsində bir sıra görüşlər keçirəcək, Fəxri Xiyabanda ulu öndər Heydər Əliyevin məzarını, Şəhidlər Xiyabanını ziyarət edəcəkdir.