Azərbaycan cəmiyyəti ötən illər ərzində, xüsusən də 2011-ci ildə heç bir təhrikçi hərəkətləri dəstəkləməmişdir. Ölkə daxilində sabitliyi pozmağa yönəlmiş cəhdlərə çox ciddi şəkildə təpkilər göstərilmişdir. 
Bu sözləri Yeni Azərbaycan Partiyası (YAP) sədrinin müavini-icra katibi Əli Əhmədov bir qrup şəxsin martın 11-də guya geniş aksiya keçirəcəyi ilə bağlı xəbərlərə münasibət bildirərkən söyləmişdir.
Ə.Əhmədov demişdir: "Güman edirəm ki, Azərbaycan cəmiyyəti təxminən bir il əvvəl - aprel-mart aylarında bir sıra maraqlı qüvvələr tərəfindən istiqamətləndirilən gənclərin ölkədə ictimai-siyasi sabitliyi pozmağa yönəlmiş hərəkətlərini xatırlayır. Bilirik ki, bəzi qüvvələr əsasən gəncləri öz tərəflərinə cəlb etmək istəyirlər. Amma biz əminik ki, Azərbaycan gəncləri bu cür təhrikçi qüvvələrə qoşulmaq niyyətində deyillər. Bunun da ciddi əsasları vardır. Bunlardan birincisi və ən əsası Azərbaycanda ictimai-siyasi sabitliyin, əmin-amanlığın mövcudluğudur. Bugünkü gənclik təhsil almaq, ölkənin ictimai-siyasi həyatında iştirak etmək, sakit yaşamaq imkanlarına malikdir. Biz artıq maraqlı qüvvələrin dəstəklənmədiyini bir il bundan qabaq görmüşük. Qəti əminliklə deyə bilərəm ki, əgər yenə də belə cəhdlər olacaqsa, Azərbaycan cəmiyyəti, xüsusən də Azərbaycan gəncliyi bu təhrikçi qüvvələrə "yox" cavablarını verəcəkdir.
Bugünkü Azərbaycan cəmiyyəti və gəncliyi Azərbaycan Prezidentini dəstəkləyir. Cəmiyyətimiz maraqlı dairələrin və qüvvələrin təhriki əsasında ölkəmizdə ictimai-siyasi sabitliyin pozulmasına, inkişafın qarşısının alınmasına yönəlmiş hərəkətlərə yol verməyəcəkdir.

AzərTAc