Azərbaycanın BMT-dəki daimi nümayəndəliyindən bildirmişlər ki, mayın 23-də Azərbaycan Respublikasının işğal edilmiş Dağlıq Qarabağ bölgəsində keçirilən "parlament seçkiləri" ilə bağlı ölkəmizin təşkilatdakı daimi nümayəndəliyinə BMT baş katibinin mövqeyini əks etdirən rəsmi məktub daxil olmuşdur.
Məktubda Azərbaycan tərəfi əmin edilmişdir ki, "Azərbaycan Respublikasının Dağlıq Qarabağ bölgəsində 2010-cu il mayın 23-də keçirilən "parlament seçkilərinə" BMT cəlb olunmamışdır. Həmçinin bu qeyri-qanuni "seçkilərin" heç bir qüvvəyə malik olmayan nəticələrinin BMT tərəfindən tanınmadığı vurğulanmış və Dağlıq Qarabağın Azərbaycan Respublikasının tərkib hissəsi olduğu birmənalı şəkildə təsdiq edilmişdir.
Baş katib məktubunda ATƏT-in Minsk qrupu həmsədrlərinin təklifləri əsasında Dağlıq Qarabağ münaqişəsi üzrə sülh danışıqları prosesində son zamanlar müşahidə olunan müsbət dinamikadan məmnun olduğunu, Ermənistan və Azərbaycanın bu imkandan istifadə edərək problemin nizamlanması prosesində irəliləyişə nail olacaqlarına ümid bəslədiyini qeyd etmişdir.

Şəfəq AKİFQIZI AzərTAc-ın xüsusi müxbiri
Vaşinqton