{nl}

Dekabrın 22-də Yeni Azərbaycan Partiyası (YAP) ilə Serbiya Demokrat Partiyası (SDP) arasında əməkdaşlıq haqqında Anlaşma Memorandumu imzalanmışdır.
Memorandumu Azərbaycan tərəfindən Yeni Azərbaycan Partiyası sədrinin müavini-icra katibi, Milli Məclisin deputatı Əli Əhmədov, Serbiya tərəfindən bu ölkənin kənd təsərrüfatı, ticarət, meşəçilik və su təsərrüfatı naziri və SDP sədrinin müavini Duşan Petroviç imzalamışlar.
İmzalanma mərasimindən əvvəl keçirilmiş görüşdə Əli Əhmədov demişdir ki, Azərbaycan ilə Serbiya arasında əlaqələr yüksələn xətlə inkişaf edir. Azərbaycanın və Serbiyanın dövlət başçıları arasındakı dostluq münasibətlərin hərtərəfli inkişafı üçün geniş imkanlar açmışdır. Qarşılıqlı səfərlər zamanı imzalanmış çoxsaylı sənədlər əməkdaşlığımız üçün möhkəm hüquqi baza yaratmışdır. Siyasi partiyalar arasında münasibətlərin inkişafı da dövlətlərimiz və xalqlarımızın əlaqələrinin daha da genişlənməsinə xidmət edəcəkdir.
Ə.Əhmədov YAP-ın yaranma tarixi, Azərbaycanın ictimai-siyasi həyatındakı rolu, beynəlxalq əlaqələri barədə qonaqlara ətraflı məlumat vermişdir. Bildirilmişdir ki, YAP bir sıra beynəlxalq təşkilatlar və siyasi partiyaların blokları ilə sıx əməkdaşlıq edir.
Duşan Petroviç Bakıda keçirilmiş "Modernləşmə siyasəti: yeni iqtisadi və sosial çağırışlar" mövzusunda beynəlxalq konfransın yüksək səviyyədə təşkilinə görə minnətdarlığını bildirmişdir. Nazir demişdir ki, Serbiya regionun ən çox inkişaf etmiş ölkəsi olan Azərbaycan ilə əlaqələrin inkişafında maraqlıdır. Bu gün iki ölkə arasında münasibətlər daha da möhkəmlənir. Hökumətlərarası Komissiya həyatın müxtəlif sahələrində əməkdaşlığın genişlənməsini təmin edir. Düşünürük ki, hakim Yeni Azərbaycan Partiyası ilə Serbiya Demokrat Partiyası arasında imzalanmış Memorandum xalqlarımızın dostluq münasibətlərinin daha da dərinləşməsinə və inkişafına xidmət edəcəkdir.