Memorandumu Yeni Azərbaycan Partiyası sədrinin müavini-icra katibi, Milli Məclisin deputatı Əli Əhmədov, Monteneqro Sosialistlərinin Demokratik Partiyasının sədri, Monteneqronun sabiq Prezidenti və Baş naziri Milo Çukanoviç imzalamışlar.
Mərasimdə çıxış edən Əli Əhmədov demişdir ki, Azərbaycan dövlət müstəqilliyini bərpa etdikdən sonra dünya dövlətləri, o cümlədən Monteneqro ilə sıx əlaqələr qurmuşdur. Monteneqro ilə əlaqələrimiz yüksələn xətlə inkişaf edir. Dövlətlərimizin başçıları arasındakı yüksək səviyyəli siyasi dialoq dostluq münasibətlərinin hərtərəfli inkişafı üçün geniş imkanlar açmışdır. Ölkələrimiz arasında imzalanmış çoxsaylı sənədlər əməkdaşlığımız üçün möhkəm hüquqi baza yaratmışdır. Əlaqələrimizin siyasi partiyalar arasında da genişlənməsi dövlətlərimiz və xalqlarımızın münasibətlərinin daha da möhkəmlənməsinə xidmət edəcəkdir. Ə.Əhmədov Azərbaycanın dinamik inkişafı, əldə etdiyi uğurları, 2012-ci ildə Bakıda keçiriləcək "Evrovision-2012" mahnı müsabiqəsinə hazırlıq barədə ətraflı məlumat vermişdir.
Milo Çukanoviç demişdir ki, Azərbaycanın inkişafı və uğurları göz qabağındadır. Biz regionun ən çox inkişaf etmiş ölkəsi olan Azərbaycan ilə əlaqələrin inkişafında maraqlıyıq. Bizim Azərbaycan Prezidenti ilə möhkəm dostluq münasibətimiz vardır və bu münasibətlər əlaqələrimizin hərtərəfli inkişafı üçün geniş imkanlar açır. Düşünürəm ki, hakim Yeni Azərbaycan Partiyası ilə Monteneqro Sosialistlərinin Demokratik Partiyası arasında imzaladığımız Memorandum xalqlarımızın dostluq münasibətlərinin daha da dərinləşməsinə və inkişafına xidmət edəcəkdir.
Görüşdə hər iki partiyanın gənclər təşkilatları arasında əlaqələrin inkişaf perspektivləri, qarşılıqlı səfərlərin təşkili, beynəlxalq əməkdaşlıq və s. məsələlər ətrafında geniş fikir mübadiləsi aparılmışdır.

AzərTAc