Azərbaycanın Baş naziri Artur Rasizadə dekabrın 22-də ölkəmizdə səfərdə olan Monteneqro Respublikasının sabiq Prezidenti və Baş naziri, Monteneqro Sosialistlərinin Demokratik Partiyasının sədri Milo Çukanoviç ilə görüşmüşdür.
Artur Rasizadə ölkələrimiz arasında əlaqələrin inkişafında qarşılıqlı səfərlərin önəmini qeyd etmiş, Azərbaycanın iqtisadi inkişafı barədə məlumat vermişdir. Baş nazir son illər qeyri-neft sektorunun inkişafına xüsusi diqqət yetirildiyini, bu sahə üzrə 9 faiz artımın əldə olunduğunu vurğulamışdır.
Azərbaycanın Baş naziri ölkəmizin əsas problemi - Ermənistan-Azərbaycan, Dağlıq Qarabağ münaqişəsi haqqında da danışmış, respublikamızın məsələnin beynəlxalq hüquq normaları əsasında və sülh yolu ilə həllinin tərəfdarı olduğunu vurğulamışdır. Baş nazir qeyd etmişdir ki, Azərbaycanın ərazi bütövlüyü danışıqlar mövzusu deyildir.
Monteneqro Respublikasının sabiq Prezidenti və Baş naziri, Monteneqro Sosialistlərinin Demokratik Partiyasının sədri Milo Çukanoviç sonuncu dəfə Azərbaycana etdiyi səfəri xatırlamışdır. Azərbaycanı Monteneqronun dostu adlandıran sabiq prezident ölkədə gedən sürətli inkişaf proseslərini diqqətlə izlədiyini demişdir.
Görüşdə ölkələrimiz arasında ikitərəfli əlaqələrin perspektivləri ətrafında fikir mübadiləsi aparılmışdır.

AzərTAc