Azərbaycanda səfərdə olan Parisin 7-ci rayonunun meri, Avropa Parlamentinin deputatı xanım Rəşidə Dati dekabrın 21-də Milli Məclisin sədri Oqtay Əsədovla görüşmüşdür.
Görüşdə Milli Məclisin sədri belə səfərlərin Azərbaycan ilə Avropa İttifaqı və Avropa Parlamenti arasında əlaqələrin inkişafında əhəmiyyətli rol oynadığını bildirmişdir.
Qeyd olunmuşdur ki, Avropaya inteqrasiya Azərbaycanın xarici siyasətinin əsas istiqamətlərindən biridir. Ölkəmiz Avropanın enerji təminatında da etibarlı tərəfdaş olduğunu təsdiqləmişdir.
O.Əsədov Azərbaycan-Fransa münasibətlərini yüksək qiymətləndirərək bu istiqamətdə parlamentarilərin rolunu xüsusi qeyd etmişdir. Ermənistan-Azərbaycan, Dağlıq Qarabağ münaqişəsi barədə qonağa ətraflı məlumat verən O.Əsədov demişdir ki, bu problem Azərbaycanın və regionun inkişafına ciddi maneə yaradır.
Milli Məclisin sədri beynəlxalq ictimaiyyətin münaqişənin dövlətlərin ərazi bütövlüyü və sərhədlərin toxunulmazlığı, beynəlxalq hüququn norma və prinsipləri çərçivəsində həllinə dəstək göstərəcəyinə ümidvar olduğunu bildirmişdir.
Azərbaycana yenidən səfər etməsindən məmnun qaldığını vurğulayan xanım Rəşidə Dati Bakıya hər gəlişində yeni inkişafla qarşılaşdığını demişdir. O, Dağlıq Qarabağ münaqişəsinin ədalətli həllində Azərbaycanın haqlı mövqeyini dəstəklədiyini və bu istiqamətdə səylərini əsirgəməyəcəyini demişdir.
O bildirmişdir ki, Avropa Parlamenti, eləcə də Fransa Azərbaycan ilə əlaqələrin inkişafında maraqlıdır. Onun təmsil etdiyi təşkilat və Fransa hökuməti qarşıya çıxan problemlərin həllində Azərbaycana kömək etməyə hazırdır.
Görüşdə Azərbaycan ilə Avropa Parlamenti arasında münasibətlərin inkişaf perspektivləri, parlamentlərarası əlaqələr, eləcə də qarşılıqlı maraq doğuran məsələlərə dair fikir mübadiləsi aparılmışdır.
AzərTAc