"Vaşiqton Post" qəzetinin redaktoru Fred Hayat ABŞ-ın Azərbaycandakı səfiri Mətyu Brayzəni vəzifəsinə təsdiqləməyən ABŞ Senatı Komitəsinin mövqeyini tənqid etmişdir. O, yazısında bildirmişdir ki, Prezident Obamanın təyinatı olan peşəkar diplomat, Senat Komitəsi tərəfindən namizədliyi səsverməyə çıxarılmadığına görə, geri dönməlidir. Vaşinqtonun siyasi həyatında bu, kiçik bir hadisə olsa da, ABŞ milli maraqlarının xüsusi maraq qruplarının qurbanına çevrilməsini aydın nümayiş etdirən misaldır. 
Məqalədə qeyd olunur ki, Brayzəyə qarşı kampaniyanın məğzi onun namizədliyinin Amerikanın Erməni Milli Komitəsi və erməni mənşəli seçici dairələrini təmsil edən Senator Barbara Bokserə və Senator Robert Menendezə yaramamasıdır. Diplomatın öz işində səmərəliliyini heç nəzərə almayan bu dairələrin qarşı arqumentləri isə bundan ibarətdir ki, Mətyu Brayzə Menendezə görə, ABŞ tərəfindən "erməni soyqırımı"nın tanınmasını istəmir, Bokserə görə, Azərbaycanın Ermənistana qarşı təcavüzünü kifayət qədər pisləmir, Erməni Milli Komitəsinə görə isə, həyat yoldaşı türk mənşəlidir. "Vaşinqton Post" bildirir ki, bu şübhələr başqaları tərəfindən qəbul edilmir. Əksinə, 36 xarici siyasət xadimi, o cümlədən dövlət katibinin sabiq müavinləri Tomas Pikerinq və Nikolas Börns ötən həftə məktub yazaraq Brayzənin strateji uzaqgörənlik, etimad, liderlik kimi qabiliyyətə malik nümunəvi səfir adlandırmışlar. Peşəkar diplomatın namizədliyinin təsdiqlənməməsi mühüm bölgədə ABŞ-ın maraqlarına ziyan vuracaqdır.
"Vaşinqton Post" onu da qeyd edir ki, Mətyu Brayzə ABŞ səfiri kimi Azərbaycanda hakimiyyətlə vətəndaş cəmiyyəti arasında dialoqun qurulması, Ermənistanla münasibətlərin yaxşılaşdırılmasını dəstəkləyir. İndi isə erməni lobbisi və 100 nəfər senatordan ikisinin səyi nəticəsində onun namizədliyinə qoyulan vetonu görən Azərbaycan növbəti səfirin neytrallığına çətin etibar edə.
Fred Hayat hesab edir ki, bunların hamısında uduzan isə amerikalılar və ya azərbaycanlılar deyil, kasıb, təcrid olunmuş və yenə də nüfuz oyunlarının qurbanına çevrilən ermənilər olacaqlar.

Şəfəq AKİFQIZI AzərTAc-ın xüsusi müxbiri
Vaşinqton