Dekabrın 19-da Milli Məclisin sədri Oqtay Əsədov Asiya Siyasi Partiyaları Beynəlxalq Konfransının həmsədri Xose Klaveriya de Venesiya ilə görüşmüşdür.  
Milli Məclisin mətbuat xidmətindən AzərTAc-a bildirmişlər ki, görüşdə qonağa müstəqil Azərbaycanın son iyirmi ildə əldə etdiyi uğurlar barədə məlumat verilmişdir.
Parlamentin sədri bildirmişdir ki, müstəqil xarici siyasət yürüdən Azərbaycan bütün ölkələr, o cümlədən Filippinlə əlaqələrin inkişafına maraq göstərir. Ölkəmiz dünyanın nüfuzlu beynəlxalq qurumları ilə də faydalı əməkdaşlıq edir. Bu baxımdan Asiya Siyasi Partiyaları Beynəlxalq Konfransı ilə Yeni Azərbaycan Partiyası arasındakı əlaqələr təqdirəlayiqdir. Azərbaycanın iqtidar partiyasının 200-ə yaxın siyasi qurumunu özündə birləşdirən belə bir nüfuzlu təşkilatın Daimi Komitəsinin üzvü olması bizim üçün çox önəmlidir. Biz siyasi qurumlar arasında münasibətlərin inkişafını bölgə həqiqətlərinin dünya ictimaiyyətinə çatdırılması baxımından əhəmiyyətli hesab edirik.
O.Əsədov Azərbaycan ilə Filippin arasında münasibətlərin dərinləşməsində parlamentlərin önəmli rol oynaya biləcəyini söyləmişdir.
Müxtəlif vaxtlarda Filippində beş dəfə Nümayəndələr Palatasına sədrlik etdiyini diqqətə çatdıran Xose Klaveriya de Venesiya dövlətlərarası əməkdaşlığın inkişafında parlamentlərin rolunu yaxşı başa düşdüyünü və bu istiqamətdə səyləri təqdir etdiyini bildirmişdir. Qonaq təmsil etdiyi qurumla YAP arasında yaranmış əlaqələri yüksək qiymətləndirmişdir. Gələcəkdə əməkdaşlığın daha da dərinləşdirilməsi istiqamətində birgə layihələr həyata keçirmək fikrində olduğunu vurğulamışdır.
Görüşdə tərəfləri maraqlandıran məsələlər ətrafında fikir mübadiləsi aparılmışdır.