ABŞ Konqresinin Azərbaycan üzrə İşçi Qrupuna yenicə qoşulan və qondarma "erməni soyqırımı"na qarşı çıxan konqresmen Maykl MakMahon hesab edir ki, Ermənistan-Azərbaycan, Dağlıq Qarabağ münaqişəsi nə qədər tez həll olunsa, bu, Türkiyə-Ermənistan münasibətlərinin normallaşmasına bir o qədər müsbət təsir edəcəkdir.
Konqresmenin sözlərinə görə, Dağlıq Qarabağın işğal olunması Ermənistan və Türkiyə arasında münasibətlərin normallaşmasına əngəl törədir. Bu, həmçinin Ermənistanın diqqətini əsas məsələdən - ölkədəki yoxsulluqdan yayındırır.
Dağlıq Qarabağ sülh prosesinə toxunan M.MakMahon bildirmişdir ki, həlli uzadılmış danışıqların donunun açılması prosesi asan məsələ deyildir. Son vaxtlar Azərbaycan-Ermənistan münasibətlərinin normallaşmasında müəyyən canlanma müşahidə olunur. Azərbaycan, Türkiyə və ABŞ beynəlxalq ictimaiyyətin dəstəklədiyi yeni siyasət üçün açıqdırlar.
Konqresmen xatırlatmışdır ki, o, ATƏT-in Minsk qrupunun təklif etdiyi əsas prinsipləri tamamilə dəstəkləyir.
M.MakMahon vurğulamışdır ki, ABŞ azərbaycanlıların və türklərin dostudur və bütün dünyada sülh uğrunda mübarizə aparır.
AzərTAc{nl}