APA-nın Vaşinqton müxbirinə Konqresdən bildirmişlər ki, "Qafqazda münaqişələr: həll perspektivləri" mövzusunda dinləmələr dekabrın 7-də keçiriləcək. Dinləmələrdə tanınmış ABŞ analitikləri, rəsmi şəxslər, senatorlar, həmçinin Karnegi Beynəlxalq Sülh Fondunun nümayəndəsi Tomas de Vaal, Brukinqz İnstitutunun baş elmi işçisi Fiona Hill və Amerika Xarici Siyasət Şurasının əməkdaşı Ueyn Merri (Wayne Merry) iştirak edəcəklər. 
Tədbirdə münaqişələrin hazırkı vəziyyəti, onların həllinə hansı faktorların mane olduğu, hərbi əməliyyatların bərpasının ciddi təhdid olub-olmadığı, danışıqlar formatının dəyişməsinin daha yaxşı nəticələrə səbəb olub-olmayacağı, ABŞ-ın münaqişələrin həllinə kömək imkanları araşdırılacaq.
Təşkilatçılar qeyd etmişlər ki, Sovet İttifaqının dağılmasından 20 il sonra Qafqazda həll olunmamış münaqişələr ən əsas problemlərdən biri olaraq qalır. ATƏT-in Dağlıq Qarabağla bağlı uzunmüddətli vasitəçiliyinə baxmayaraq, nəticələr məyusedicidir".
Helsinki Komissiyasında hesab edirlər ki, 2008-ci il Rusiya-Gürcüstan müharibəsindən və Moskva Abxaziya və Cənubi Osetiyanın müstəqilliyini tanıyandan sonra bu münaqişələrin həlli perspektivləri həmişəkindən daha uzaq görünür.