Dekabrın 1-də Azərbaycanın xarici işlər naziri Elmar Məmmədyarov iqamətgahı Ankarada yerləşən İrlandiyanın ölkəmizdəki səfiri Tomas Rassel ilə görüşmüşdür.
Xarici İşlər Nazirliyinin mətbuat xidmətindən bildirmişlər ki, E.Məmmədyarov 2012-ci ildə ATƏT-dəki sədrliyinin başlanması münasibətilə İrlandiyanı Azərbaycanın adından təbrik etmişdir.
Səfir ölkəmizi 2012-2013-cü illər üçün BMT Təhlükəsizlik Şurasına qeyri-daimi üzv seçilməsi münasibətilə təbrik etmiş, Azərbaycanın qısa zamanda sürətli dinamik inkişafından məmnunluğunu bildirmişdir. İrlandiyalı diplomat ATƏT-dəki sədrliyi müddətində ölkəsinin fəaliyyətini konstruktiv şəkildə həyata keçirəcəyinə əminliyini ifadə etmişdir.
E.Məmmədyarov Ermənistan-Azərbaycan, Dağlıq Qarabağ münaqişəsinin həlli istiqamətində beynəlxalq təşkilatların rolunun əhəmiyyətinin yüksək olduğunu qeyd etmiş, bu məsələnin Azərbaycanın ərazi bütövlüyü çərçivəsində tənzimlənməsinin vacibliyini vurğulamışdır.
Görüşdə qarşılıqlı maraq doğuran bir sıra məsələlər də müzakirə edilmişdir.
AzərTAc