Qırğızıstan Prezidentinin andiçmə mərasimində iştirak etmək üçün Bişkekə gələn Azərbaycanın Baş naziri Artur Rasizadə bu ölkənin yeni seçilmiş dövlət başçısı Almazbek Atambayev ilə görüşmüşdür. 
Baş nazir Artur Rasizadə Almazbek Atambayevi bu yüksək vəzifəyə seçilməsi münasibətilə təbrik etmiş, ölkələrimizin əlaqələrinin bundan sonra da uğurla inkişaf edəcəyini vurğulamışdır.
Almazbek Atambayev Azərbaycan xalqının ümummilli lideri, dünya şöhrətli siyasi xadim Heydər Əliyevi xatırlamış, onun türk dünyasının böyük oğlu olduğunu söyləmişdir.
Görüşdə Qırğızıstan ilə Azərbaycan arasında ikitərəfli və çoxtərəfli əlaqələrin inkişaf etdirilməsi məsələləri müzakirə olunmuşdur.
Almazbek Atambayev Azərbaycandan neft məhsullarının alınması məsələsinə toxunmuşdur. Qərara alınmışdır ki, Qırğızıstana neft məhsullarının ayrılması ilə bağlı kvota məsələsinə baxılsın. Danışıqlar zamanı ticari-iqtisadi, investisiya, mədəniyyət sahələrində əməkdaşlığın genişləndirilməsi məsələləri də diqqət mərkəzində olmuşdur.
Qırğızıstanın yeni prezidenti Azərbaycanın iqtisadiyyatının uğurla inkişafından məmnun olduğunu bildirmişdir.
Baş nazir Artur Rasizadə Ermənistan-Azərbaycan, Dağlıq Qarabağ münaqişəsi, bunun nəticəsində 1 milyondan artıq qaçqın və məcburi köçkünün yaranması, onların problemlərinin həlli və digər məsələlər haqqında məlumat vermişdir.
Görüşdə Azərbaycanın Qırğızıstandakı səfiri Arif Ağayev iştirak etmişdir.

Qulu KƏNGƏRLİ, AzərTAc-ın xüsusi müxbiri
Bişkek