Azərbaycan torpaqlarının işğaldan azad olunması bölgəyə daimi sülh gətirəcəkdir. Bu fikri Türkiyənin xarici işlər naziri Əhməd Davudoğlu İstanbulda keçirilən Avropa-Aralıq dənizi Parlament Assambleyasının toplantısında səsləndirmişdir.
Türkiyə xarici siyasət idarəsinin başçısı bildirmişdir ki, rəsmi Ankara Ermənistanla normallaşma prosesinin də gələcəkdə həyata keçəcəyinə inanır. Bu siyasətdə heç bir dəyişiklik yoxdur. Amma buna paralel olaraq Dağlıq Qarabağ münaqişəsinin həlli və Azərbaycanın işğal edilmiş torpaqları ilə bağlı problemin nizama salınması bölgədə sülhün bərqərar olunması baxımından böyük bir imkan yaradacaqdır.
Əhməd Davudoğlu İranla imzalanmış sazişdən də bəhs etmişdir. Onun sözlərinə görə, bu sənəd beynəlxalq ictimaiyyətin mənafelərinə uyğundur və Tehranın son 30 ildə atdığı ən mühüm addımdır. Türkiyə İranın nüvə proqramına dair Qərbdə yaranmış şübhə və narahatlığı anlayır və etimad atmosferinin yaranması üçün səylərini davam etdirəcəkdir.

Oqtay BAYRAMOV AzərTAc-ın xüsusi müxbiri
Ankara