Türkiyənin "Cihan" informasiya agentliyinin verdiyi xəbərə görə, Böyük Britaniyanın LİNKS təşkilatının icraçı direktoru Dennis Sammut London Universitetində Azərbaycanın xarici siyasəti ilə bağlı çıxış etmişdir.
Son illər Azərbaycana tez-tez səfər etdiyini bildirən Dennis Sammut ölkəmizdəki inkişaf prosesini yaxından izlədiyini demişdir. Rəsmi Bakının Dağlıq Qarabağ probleminin həllinə daha çox diqqət yetirdiyini və bu məsələnin ölkənin xarici siyasətində ən mühüm yer tutduğunu diqqətə çatdıran natiq, danışıqlar nəticə verməzsə əhalinin böyük hissəsinin torpaqları hərb yolu ilə azad etmək tərəfdarı olduğunu söyləmişdir.
Dennis Sammut onu da vurğulamışdır ki, Azərbaycanın zəngin təbii sərvətləri və uğurlu xarici siyasəti son illərdə dünyada onun nüfuzunu möhkəmləndirmişdir. Rəsmi Bakı çoxşaxəli xarici siyasət yürüdür, Rusiya ilə münasibətlərini gücləndirməklə yanaşı, ABŞ və İsraillə də əlaqələrdə yaxşı nəticələrə nail olmuşdur.
İngilis siyasi şərhçisi çıxışının sonunda bildirmişdir ki, dünyada enerjiyə olan tələbatın artdığı bir dövrdə vəziyyət Azərbaycanın xeyrinə dəyişir və indi ölkənin yüksəldiyi zirvə on il öncə xəyal belə edilə bilməzdi. O, Britaniyada yeni qurulan koalisiya hökumətinin Azərbaycanla münasibətlərə daha çöx əhəmiyyət verəcəyini də söyləmişdir.

Oqtay BAYRAMOV, AzərTAc-ın xüsusi müxbiri
Ankara