BMT-nin baş katibi Pan Gi Mun BMT Günü münasibətilə müraciətlə çıxış edib. BMT-nin Azərbaycandakı nümayəndəliyindən APA -ya verilən məlumata görə, müraciətdə deyilir: "Bu yaxınlarda bəşər ailəsi özünün 7 milyardıncı üzvünə "xoş gəldin" deyəcək. Bəziləri planetimizin çox basırıq olduğunu söyləyir. Mənsə deyirəm ki, biz 7 milyard olaraq güclüyük. 
66 il öncə BMT-nin təsis edildiyi gündən bəri dünya nəzərəçarpacaq dərəcədə inkişaf edib. İndi insanlar daha uzunömürlüdürlər. Daha çox uşaqlarımız sağ qalır. Getdikcə daha çoxumuz demokratik qanunlar altında, sülh şəraitində yaşayırıq. Bu dramatik ildə şahidi olduğumuz kimi, hər yerdə insanlar öz hüquq və azadlıqlarının müdafiəsinə qalxırlar. Lakin hələ də bütün bu inkişaf təhlükə altındadır. İqtisadi böhran, artan işsizlik və bərabərsizlik, iqlim dəyişkənliyi əsas təhlükələrdir. Dünyada çox sayda insan qorxu içində yaşayır. Bir çox insan dövlətlərinin və qlobal iqtisadiyyatın daha onların gözləntilərinə cavab vermədiyini düşünür. Belə qarışıq vaxtlarda yalnız bir çıxış yolu var: məqsəd birliyi".
Baş katib bəyan edib ki, qlobal problemlər qlobal həll yolları tələb edir: "Bu problemlər bütün millətləri dünya əhalisinin gündəliyində duran fəaliyyətləri həyata keçirmək üçün birləşməyə çağırır. Bu, Birləşmiş Millətlər Təşkilatının ən başlıca missiyasıdır. Daha yaxşı dünya qurmaq, heç kimi diqqətdən kənarda qoymamaq, qlobal sülh və sosial ədalət naminə yoxsulları və köməksiz insanları müdafiə etmək. Bu xüsusi gündə gəlin etiraf edək ki, Birləşmiş Millətlər Təşkilatına heç vaxt bu qədər ehtiyac duyulmamışdı.
Getdikcə daha sıx qarşılıqlı əlaqələrin olduğu dünyamızda hər birimizin bir-birimizdən öyrənəcəyimiz nələrsə var. Gəlin, 7 milyard güclü insan olaraq qlobal ümumi maraqlar naminə birləşək".