Avropada bir sıra separatçı hərəkatlar ölkələrin ərazi bütövlüyünə, sülh və sabitliyə təhlükə yaradır. Bu fikir AŞ PA-nın "Müasir beynəlxalq hüquqda milli suverenlik və dövlətçilik: aydınlaşdırmaya ehtiyac" adlı 1832 saylı qətnaməsində öz əksini tapmışdır.
Trend İnformasiya Agentliyi diplomatik mənbələrə istinadla xəbər verir ki, qətnamədə milli suverenlik və dövlətçilik anlayışlarının son illər ərzində tərəqqisinin müşahidə olunduğu vurğulanmaqla yanaşı, ümumilikdə dövlətçilik meyarının müasir beynəlxalq hüquqda aktual məsələlərdən biri olduğu və Avropa Şurasına üzv ölkələrdə bir sıra ərazilərin müstəqil dövlət kimi tanınmasına cəhdlər göstərildiyi bildirilir.
Qətnamədə qeyd olunur ki, AŞ PA-nın bütün ölkələri qanunsuz ayrılma nəticəsində formalaşmış de-fakto hakimiyyət və əraziləri hər hansı formada tanımaq və ya dəstəkləməkdən çəkinməlidir. Qətnamə, eyni zamanda, beynəlxalq hüququn milli azlıqların öz müqəddəratını təyinetmə hüququnu tanımış olsa belə, bu hüququn avtomatik ayrılmaya şərait yaratmadığını vurğulayır.
Ermənistanın AŞ PA-dakı nümayəndə heyəti qətnamə layihəsinə çoxsaylı düzəlişlər etməyə (öz müqəddəratını təyinetmə prinsipinin əhəmiyyətinə və de-fakto ərazilərin tanınmasının təşviq edilməsinə istinadla cəhd etsələr də, səsvermə nəticəsində sözügedən düzəlişlər qəbul olunmamışdır.