Oktyabrın 17-də Naxçıvan Muxtar Respublikası Ali Məclisinin sədri Vasif Talıbov ATƏT-in Bakı ofisinin rəhbəri Koray Tarqay ilə görüşmüşdür. 
Qonağı səmimiyyətlə salamlayan Ali Məclisin sədri onu ATƏT-in Bakı ofisinin rəhbəri vəzifəsinə təyin olunması münasibətilə təbrik etmiş, fəaliyyətində uğurlar arzulamışdır.
ATƏT-in Bakı ofisinin keçmiş rəhbəri Əli Bilge Cankorelin Azərbaycandakı fəaliyyəti dövründə ATƏT-in Bakı ofisi ilə Naxçıvan Muxtar Respublikasının müvafiq qurumları arasında əlaqələrin inkişafından məmnunluğunu bildirən Ali Məclisin sədri demişdir ki, ötən müddət ərzində müxtəlif sahələr üzrə həyata keçirilən birgə layihələr qarşılıqlı faydalı əməkdaşlığın gələcək perspektivləri baxımından əhəmiyyətli olmuşdur.
Qeyd edilmişdir ki, hüquqi dövlət və vətəndaş cəmiyyəti quruculuğu istiqamətində qazanılmış nailiyyətlər, insan hüquq və azadlıqlarının etibarlı təmin olunması Azərbaycanı dünya miqyasında tanıdan əsas xüsusiyyətlərdən biridir. Bu gün ölkəmizdə iqtisadi, siyasi və demokratik inkişaf paralel gedir. Naxçıvan Muxtar Respublikasında da bu istiqamətdə uğurlu addımlar atılmış, mühüm layihələr həyata keçirilmiş, beynəlxalq təşkilatlarla qarşılıqlı faydalı əməkdaşlıq əlaqələri qurulmuşdur.
Ali Məclisin sədri ATƏT-in Bakı ofisi ilə əlaqələrin bundan sonra da səmərəli olacağına, yaxşı nəticələr verəcəyinə əminliyini bildirmişdir.
Səmimi görüşə görə minnətdarlıq edən Koray Tarqay Naxçıvan Muxtar Respublikasında ilk dəfə olduğunu bildirmiş, Azərbaycanın bu qədim diyarında əldə olunan sosial-iqtisadi uğurların, həyata keçirilən genişmiqyaslı quruculuq işlərinin onda böyük məmnunluq doğurduğunu qeyd etmişdir.
ATƏT-in Bakı ofisinin rəhbəri, həmçinin qeyd etmişdir ki, təmsil etdiyi təşkilat ilə Naxçıvan Muxtar Respublikası arasında əməkdaşlığın daha da inkişaf etdirilməsi işində səylərini əsirgəməyəcəkdir.
Görüşdə əməkdaşlığın hazırkı vəziyyətinə və perspektivlərinə dair fikir mübadiləsi aparılmışdır.