Oktyabrın 4-də Rusiya Federasiyası hökuməti sədrinin müavini, Rusiya Prezidentinin Şimali Qafqaz Federal Dairəsi üzrə səlahiyyətli nümayəndəsi Aleksandr Xloponin başda olmaqla Rusiya nümayəndə heyətinin Azərbaycana səfəri çərçivəsində Azərbaycan Respublikası ilə Rusiya Federasiyası arasında ikitərəfli sazişlər imzalanmışdır. 
Həmin sazişlərə görə Azərbaycan ilə Rusiyanın Şimali Qafqaz regionları arasında ticari-iqtisadi, mədəni və humanitar sahələrdə əməkdaşlıq nəzərdə tutulur. Bu məqsədlə Azərbaycan Respublikasının hökuməti ilə Dağıstan, İnquşetiya və Qaraçay-Çərkəz respublikalarının hökumətləri arasında ticari-iqtisadi, elmi-texniki, mədəni və humanitar sahələrdə əməkdaşlıq haqqında sazişlər imzalanmışdır. Sazişləri Azərbaycanın Baş nazirinin birinci müavini Yaqub Eyyubov, Dağıstan Respublikasının Prezidenti Maqomedsalam Maqomedov, İnquşetiya Respublikasının başçısı Yunusbek Yevkurov, Qaraçay-Çərkəz Respublikası hökumətinin sədri İndris Kiyabişev imzalamışlar.
Azərbaycanın Sumqayıt şəhəri ilə Rusiyanın Stavropol diyarının Nevinnomısk şəhəri arasında əməkdaşlıq və qardaşlaşma münasibətlərinin yaradılması haqqında saziş də imzalanmışdır. Bu sazişi Sumqayıt Şəhər İcra Hakimiyyətinin başçısı Eldar Əzizov və Nevinnomısk şəhərinin başçısı Konstantin Xramov imzalamışlar.

AzərTAc