Cənubi Qafqaz bölgəsinin adi bir bölgədən Avropa, Avrasiya və Transatlantik təhlükəsizliyin əsas nöqtəsinə çevrilməsi, həmçinin Rusiya-Gürcüstan müharibəsinin Dağlıq Qarabağ münaqişəsinin həllinə təsiri, Türkiyə-Ermənistan yaxınlaşması oktyabrın 3-də Vudro Vilson Mərkəzində (Woodrow Wilson Center) keçirilən tədbirdə müzakirə olunub.
APA-nın Vaşinqton müxbirinin məlumatına görə, Strateji və Beynəlxalq Araşdırmalar Mərkəzinin Rusiya və Avrasiya Proqramı üzrə əməkdaşı Sergey Markedonov qeyd edib ki, aşkar irəliləyişin olmamasına baxmayaraq, Dağlıq Qarabağ sülh prosesi əslində müsbət qiymətləndirilə bilər.
Analitik hesab edir ki, Ermənistan-Türkiyə münasibətlərinin normallaşması artıq keçmişin və gələcəyin məsələsidir. O həmçinin qeyd edib ki, Cənubi Qafqazın geosiyasi perspektivləri bir çox hallarda Dağlıq Qarabağ sülh prosesi və Ermənistan-Türkiyə münasibətlərinin inkişafından asılıdır.
"Mümkün təhdidlərə baxmayaraq, hər iki münaqişənin həlli tərəflərə böhran və riskləri aradan qaldırmağa və yenilərinin qarşısını almağa imkan verəcək".
Rusiyanın Qafqazın geosiyasətində xüsusi rol oynamaq istəyindən danışarkən analitik qeyd edib ki, bir plana əsasən hərəkət etməkdənsə, vəziyyətə əsaslanıb mövcud status-kvonu münasib olduğu zaman saxlayıb, alternativ olmayanda dəyişmək Moskva üçün daha faydalı olar.