Türkiyənin xarici işlər naziri Əhməd Davudoğlu Nyu-Yorkda keçirdiyi mətbuat konfransında bildirmişdir ki, İqtisadi Əməkdaşlıq Təşkilatı (İƏT) və Cənub-Şərqi Asiya Ölkələri Assosiasiyasının (ASEAN) 2012-ci ildə nəzərdə tutulmuş toplantıları Türkiyə, yaxud Azərbaycanda keçirilə bilər. 
Rəsmi Ankaranın bütün Asiyanı əhatə edəcək geniş iqtisadi əməkdaşlıq məkanı yaratmaq niyyətində olduğunu qeyd edən nazir demişdir ki, xarici işlər nazirlərinin Nyu-Yorkda qəbul etdikləri qərara əsasən, bu məsələlər İstanbul və ya Bakıda müzakirə olunacaqdır.
Ə.Davudoğlu bildirmişdir ki, Ankara və Vaşinqton 30 ölkənin iştirakı ilə qlobal antiterror forumu yaratmışlar.
Bir çox ölkədən, o cümlədən Azərbaycandan olan həmkarları ilə faydalı görüşlər keçirdiyini diqqətə çatdıran türkiyəli nazir qeyd etmişdir ki, Türkiyə və Finlandiyanın təşəbbüsü ilə yaradılmış "Vasitəçilik dostları" qrupu da dünyada münaqişələrin nizamlanmasına və qlobal sülhə töhfə olacaqdır.

Oqtay BAYRAMOV AzərTAc-ın xüsusi müxbiri
Ankara