Argentina-Azərbaycan parlamentlərarası dostluq qrupunun rəhbəri, Deputatlar Palatasında əmək qanunvericiliyi daimi komissiyasının sədri Roberto Mario Mouilleronun başçılığı ilə ölkəmizdə səfərdə olan nümayəndə heyəti sentyabrın 27-də Milli Məclisin sədri Oqtay Əsədovla görüşmüşdür. 
Oqtay Əsədov demişdir ki, Azərbaycan Argentina ilə münasibətlərin möhkəmləndirilməsinə böyük önəm verir. İnanırıq ki, bu səfər təkcə parlamentlərimiz arasında deyil, müxtəlif sahələrdə əməkdaşlığın inkişafına dəstək olacaqdır.
Ölkələrimizin siyasi, iqtisadi əlaqələrindən danışan O.Əsədov ikitərəfli əməkdaşlığın genişləndirilməsi üçün yaxşı potensialın olduğunu bildirmişdir. O, parlament diplomatiyasının rolunu xüsusi qeyd etmiş, bu istiqamətdə dostluq qruplarının fəaliyyətini vurğulamışdır. Milli Məclisin sədri bildirmişdir ki, Azərbaycan Cənubi Qafqazda aparıcı rola malikdir və regionda istehsal olunan ümumi daxili məhsulun 75 faizi Azərbaycana məxsusdur. Əgər Ermənistan ölkəmizə qarşı işğalçılıq siyasəti yürütməsəydi, uğurlarımız daha çox olardı.
Roberto Mario Mouilleron Azərbaycana səfərlərindən məmnunluğunu ifadə etmiş, göstərilən qonaqpərvərliyə görə dövlətimizə və xalqımıza təşəkkür etmişdir. Azərbaycan müstəqilliyini bərpa etdikdən sonra qısa bir zamanda böyük inkişaf yolu keçmişdir. İnanırıq ki, bu inkişaf davamlı olacaq və Azərbaycan daha böyük uğurlar qazanacaqdır. Qonaq demişdir ki, Azərbaycan zəngin mədəniyyətə, təbii sərvətlərə, bəşəri dəyərlərə sahib olan tolerant ölkədir. Biz sizin qarşılaşdığınız problemin mahiyyətini də yaxşı başa düşürük. Bakıya səfərimizin ilk günündə Şəhidlər Xiyabanını ziyarət etmişik. Bu bizim məsələyə münasibətimizin bir göstəricisidir.
Görüşdə qarşılıqlı maraq doğuran məsələlər ətrafında fikir mübadiləsi aparılmışdır.