Azərbaycanın xarici işlər naziri Elmar Məmmədyarov BMT Baş Məclisinin 66-cı sessiyasının çərçivəsində türkiyəli həmkarı Əhməd Davudoğlu, İraqın və Suriyanın xarici siyasət idarəsinin rəhbərləri Xoşyar Zebari və Valid Əl-Muallim ilə ikitərəfli görüşlər keçirmişdir.
Xarici İşlər Nazirliyinin mətbuat xidmətindən bildirmişlər ki, görüşlərdə ikitərəfli münasibətlərin inkişaf etdirilməsi perspektivləri, xüsusilə də iqtisadi və enerji sahələrində əməkdaşlıq imkanlarının genişləndirilməsi, regional və beynəlxalq münasibətlərin gündəliyindəki aktual məsələlər müzakirə edilmişdir.
Həmkarlar ölkələr arasındakı münasibətlərin daha da genişləndirilməsi məqsədilə qarşılıqlı səfərlər mübadilələrinin həyata keçirilməsinin vacibliyini qeyd etmişlər. Görüşlərdə, həmçinin Ermənistan-Azərbaycan, Dağlıq Qarabağ münaqişəsi və onun ədalətli həlli, İsrail-Fələstin münaqişəsi, Suriyadakı vəziyyət diqqət mərkəzində olmuşdur.
Nazir E.Məmmədyarov, eyni zamanda, Amerika Yəhudi Komitəsinin üzvləri ilə də görüşmüşdür. Görüşdə Ermənistan-Azərbaycan, Dağlıq Qarabağ problemi, İsrail-Fələstin münaqişəsi, enerji təhlükəsizliyi və qarşılıqlı maraq kəsb edən digər məsələlər ətrafında fikir mübadiləsi aparılmışdır.

AzərTAc