Gürcüstan Dağlıq Qarabağda yerli özünüidarəetmə orqanlarına keçirilən "seçkiləri" tanımır.
AzərTAc gürcü KİV-lərinə istinadla xəbər verir ki, bu sözlər Gürcüstanın Xarici İşlər Nazirliyinin (XİN) bəyanatında əksini tapmışdır.
Bəyanatda deyilir: "Gürcüstan XİN Azərbaycanın suverenliyi və beynəlxalq ictimaiyyət tərəfindən tanınmış sərhədlər daxilindəki ərazi bütövlüyünü dəstəkləyir və Dağlıq Qarabağda yerli özünüidarəetmə orqanlarına keçirilən qanunsuz "seçkiləri" tanımır".
Xarici siyasət idarəsinin bəyanatında Ermənistan-Azərbaycan, Dağlıq Qarabağ münaqişəsinin nizamlanması istiqamətində göstərilən səylərin alqışlandığı və sülh danışıqlarına alternativin olmadığı da vurğulanır.