Türkiyədə rəsmi səfərdə olan Milli Məclisin sədri Oqtay Əsədov İstanbuldakı "Tarabya" köşkündə Türkiyə Prezidenti Abdullah Gül ilə görüşmüşdür. 
Azərbaycan parlamentinin sədrini və deputatlarını səmimiyyətlə qarşılayan Prezident Abdullah Gül iki qardaş ölkə arasında əlaqələrin yüksək səviyyəsindən məmnunluğunu bildirmişdir. Prezident İlham Əliyevin Türkiyəyə, Türkiyə rəhbərlərinin isə Azərbaycana səfərlərinin ikitərəfli əlaqələrin inkişafındakı rolunu vurğulayan Abdullah Gül bu münasibətlərin gələcəkdə də möhkəmlənəcəyinə inamını ifadə etmişdir. Bu kontekstdə parlamentlərarası əlaqələrin genişləndirilməsinin vacibliyini qeyd edən Türkiyə dövlətinin başçısı qanunverici orqanlarımız arasında əməkdaşlığın əhəmiyyətini də vurğulamışdır.
Milli Məclisin sədri Azərbaycan Prezidenti İlham Əliyevin salamlarını Türkiyə Prezidenti Abdullah Gülə çatdırmışdır. O.Əsədov parlamentlər arasında əlaqələrin yüksək səviyyədə olduğunu qeyd etmiş, gələcəkdə birgə proqramların həyata keçiriləcəyini demişdir.
Prezident Abdullah Gül də onun salamlarını Azərbaycan dövlətinin başçısına çatdırmağı xahiş etmişdir.
Görüşdə beynəlxalq və regional, xüsusilə Ermənistan-Azərbaycan, Dağlıq Qarabağ münaqişəsinin nizamlanması məsələləri ətrafında fikir mübadiləsi aparılmışdır.

Oqtay Bayramov AzərTAc-ın xüsusi müxbiri
Ankara