Məsələnin Baş Assambleyada gözlənilən müzakirəsi həmçinin, ölkəmizin hücumçu diplomatiyasının göstəricisidir. Bu fakt onu təsdiqləyir ki, Azərbaycan bütün səviyyələrdə Ermənistanın işğalçılıq siyasətini ifşa edir, beynəlxalq təşkilatlarda ədalətli qərarların qəbul edilməsinə nail olur.
Bu fikirləri yap.org.az saytına açıqlamasında YAP İcra katibinin müavini, Milli Məclisin deputatı Mübariz Qurbanlı demişdir. O qeyd etmişdir ki, bu məsələnin Assambleyanın gündəliyinə daxil edilməsinə qarşı yalnız Ermənistanın çıxması bu dövlətin işğalçılıq mahiyyətinin əyani göstəricisidir. Ermənistan məsələnin əleyhinə səs verməklə beynəlxalq hüquq normaları və prinsiplərini pozduğunu bir daha nümayiş etdirir.
M.Qurbanlı bildirmişdir ki, Dağlıq Qarabağ münaqişəsinin həlli ilə bağlı Azərbaycanın mövqeyi beynəlxalq hüquq prinsiplərinə əsaslanır. Beynəlxalq hüququn norma və prinsipləri ərazi bütövlüyünü və suverenliyi ön plana çəkir. Ərazi bütövlüyü və suverenlik məsələsi bu danışıqlarda Azərbaycan tərəfinin irəli sürdüyü başlıca fikirdir. Ermənistanın işğalçılıq siyasəti nəticəsində Azərbaycanın ərazi bütövlüyü pozulmuşdur. Ona görə də, BMT Təhlükəsizlik Şurası işğalçı Ermənistanın Azərbaycana təcavüzü ilə əlaqədar dörd qətnamə qəbul etmişdir.
"Dövlətlərarası münaqişələrin və qarşıdurmaların aradan qaldırılmasında BMT-nin özünəməxsus yeri və rolu var. BMT Təhlükəsizlik Şurası yeganə beynəlxalq təşkilatdır ki, bu qurumun qəbul etdiyi qərar və qətnamələr üzv dövlətlər tərəfindən yerinə yetirilməlidir. Əslində, bu gün dünyada sülhün, əmin-amanlığın, təhlükəsizliyin və mövcud problemlərin həlli BMT-nin üzərində dayanıb. BMT böyük bir təşkilat olmaqla yanaşı, həm də siyasi məsuliyyət daşıyan bir qurumdur" - deyə YAP İcra katibinin müavini vurğulamışdır.