Səfir İsrail-Türkiyə münasibətlərindəki gərginliyin İsrail-Azərbaycan əlaqələrinə mümkün təsiri barədə fikirlərə münasibətini açıqlamışdır
İsrailin Azərbaycandakı səfiri Mixael Lotem İsrail-Türkiyə münasibətlərindəki mövcud gərginliyin İsrail-Azərbaycan əlaqələrinə mümkün təsiri barədə mətbuatda səslənən fikir və rəylərə münasibətini açıqlayıb.
İsrail səfiri APA-ya açıqlamasında bildirib ki, Azərbaycan və İsrail arasındakı münasibətlər məxsusi və möhkəm bünövrəyə əsaslanan siyasi, strateji, iqtisadi və mədəni sahədəki ortaq maraq və hədəflərə söykənir: "Bu münasibətlər müxtəlif layihə və fəaliyyət proqramlarını əhatə edir və bu əlaqələr üçüncü tərəfin maraqlarının predmeti ola bilməz. Ölkə rəhbərlikləri arasında sıx və birbaşa təmaslar təsadüfi rəy müxtəlifliyini dəf etməyə imkan verir. İsrail Türkiyə ilə münasibətlərini sahmana salmaqda qəti əzmə malikdir və Yaxın Şərqdəki siyasi vəziyyət bunu tələb etdiyinə görə mən nikbin olaraq qalıram. Mənim nikbinliyim yalnız maraq və ehtiyacların ortaqlığında deyil, habelə yəhudi və türklər arasında və Yaxın Şərqin aparıcı demokratiyaları olan İsrail ilə Türkiyənin tarixi əlaqələrinə söykənir".