Mən Ermənistanın Azərbaycan torpaqlarını işğal etməsi faktını pisləyirəm. İşğal Avropa dəyərlərinə və beynəlxalq hüququn norma və prinsiplərinə ziddir. Hesab edirəm ki, işğal altında olan ərazilər Azərbaycana qaytarılmalıdır.
Bu sözləri Azərbaycanda səfərdə olan Avropa Şurası Parlament Assambleyasının (AŞPA) Hüquq məsələləri və insan hüquqları Komitəsinin sədri Kristos Pirqurides sentyabrın 2-də Milli Məclisin sədri Oqtay Əsədovla görüşdə demişdir.
Rəsmi Bakının Azərbaycanın Avropa Şurası ilə əməkdaşlığından razı olduğunu vurğulayan O.Əsədov qeyd etmişdir ki, ölkəmiz artıq 10 ildir ki, Avropa Şurasının üzvüdür. Bu müddət ərzində Azərbaycan öz qanunlarının Avropa qanunlarına uyğunlaşdırılması istiqamətində mühüm addımlar atmış, AŞPA-nın 50-dən çox sənədinə qoşulmuşdur. Azərbaycanda demokratik təsisatlar, institutlar sürətlə inkişaf edir, insan hüquq və azadlıqlarının müdafiəsinə xüsusi diqqət yetirilir. Bütün bu proseslərdə Avropa Şurasının müstəsna rolu danılmazdır. Bu mənada biz Avropa Şurasına minnətdarıq.
Milli Məclisin sədri AŞPA-da mövcud olan ikili standartlardan da danışmış, Azərbaycana qarşı ikili münasibətlərə son qoyulacağına ümidvar olduğunu bildirmişdir.
K.Pirqurides beş il bundan əvvəl də Bakıda olduğunu, ötən müddət ərzində Azərbaycanın sürətlə inkişaf etdiyini vurğulamışdır. O, Azərbaycanın iqtisadi inkişafını, insan hüquq və azadlıqlarının qorunması istiqamətində görülmüş işləri yüksək qiymətləndirmişdir.
Görüşdə qarşılıqlı maraq doğuran digər məsələlər ətrafında da fikir mübadiləsi aparılmışdır.