Milli Məclisin beynəlxalq münasibətlər və parlamentlərarası əlaqələr komitəsinin sədri, Azərbaycanın Avropa Şurası Parlament Assambleyasındakı (AŞPA) daimi nümayəndə heyətinin rəhbəri Səməd Seyidovun başçılığı ilə deputat qrupu sentyabrın 7-dən 12-dək Parisdə səfərdə olacaqdır. 
Nümayəndə heyətinə deputatlardan Rəfael Hüseynov, Sevinc Fətəliyeva, Sahibə Qafarova və Elxan Süleymanov daxildirlər. Səfərin məqsədi AŞPA-nın daimi komitələrinin iclaslarında iştirak etməkdir.
Milli Məclisin mətbuat xidmətindən bildirmişlər ki, AŞPA-nın Hüquqi işlər və insan haqları, Monitorinq, Qadınlar və kişilər üçün bərabər imkanlar, Sosial, səhiyyə və ailə işləri üzrə komitələrinin toplantılarında dövlət sirri və milli təhlükəsizlik, terrorizmə qarşı mübarizə, onlayn mətbuatda məxfiliyin və şəxsi məlumatların mühafizəsi, Ermənistanda demokratik təsisatların fəaliyyəti, Serbiyada öhdəliklərin yerinə yetirilməsi, Türkiyədəki mövcud durum, dünyada qadın hüquqlarının qorunması, siyasi partiyalarda gender bərabərliyinin təşviqi və digər məsələlər müzakirə ediləcəkdir.

AzərTAc