Belarus XİN-in mətbuat xidmətindən bildirmişlər ki, martın 30-31-də Bakıda Belarus və Azərbaycan xarici işlər nazirlikləri arasında məsləhətləşmələr keçiriləcəkdir. Bu məsləhətləşmələr xarici işlər nazirlərinin müavinləri səviyyəsində olacaqdır.
Belarus tərəfini xarici işlər nazirinin birinci müavini İqor Petrişenko təmsil edəcəkdir.
Məsləhətləşmələr zamanı Azərbaycan və Belarus arasında münasibətlərin vəziyyəti və əsas istiqamətləri, o cümlədən yüksək səviyyədə dialoqun inkişafı, beynəlxalq təşkilatlar çərçivəsində qarşılıqlı fəaliyyət, müqavilə-hüquq bazasının genişləndirilməsi məsələləri ilə əlaqədar mövqelərin razılaşdırılması nəzərdə tutulmuşdur.
Ötən il Belarus ilə Azərbaycan arasında əmtəə dövriyyəsi 124,6 milyon dollara çatmışdır. Bu isə 2008-ci illə müqayisədə 11,6 faiz çoxdur. İxrac 120,3 milyon dollar (14,1 faiz artım), idxal isə 4,3 milyon dollar (31,1 faiz azalma) olmuşdur. 116 milyon dollar həcmində müsbət saldo yaranmışdır.
Belarusdan Azərbaycana, əsasən, maşınqayırma, ağac emalı sənayesi, istehlak malları, ərzaq məhsulları idxal olunur.
Azərbaycandan Belarusa ixrac olunan mallar arasında kənd təsərrüfatı məhsulları və xammal (meyvə-tərəvəz şirələri, spirtli içkilər, tütün xammalı, qoz-fındıq, kompleks sintetik sapdan toxunan parçalar) üstünlük təşkil etmişdir.

Zeynal AĞAZADƏ AzərTAc-ın xüsusi müxbiri
Minsk