Bir sıra ölkələrin BMT yanında daimi nümayəndələri Azərbaycanda səfərdədirlər.
Azərbaycanın BMT yanında daimi nümayəndəsi, səfir Aqşin Mehdiyev AzərTAc-a bildirmişdir ki, BMT-nin üzvü olan dövlətlərin bəzilərinin Azərbaycanda, respublikamızın da bəzi ölkələrdə səfirlik və yaxud nümayəndəliyi yoxdur. Ona görə Azərbaycan hökuməti qərara gəlmişdir ki, respublikamızda səfirliyi və ya nümayəndəliyi olmayan ölkələrin nümayəndələri Bakıya dəvət edilsinlər. Həmin ölkələrin nümayəndələrinin səfərinin əsas məqsədi onları Azərbaycanın siyasi, iqtisadi, mədəni, sosial həyatı ilə yaxından tanış etmək, problemlərimiz haqqında məlumatlandırmaqdır. Ümidvaram ki, bu cür səfərlərin təşkili Azərbaycanın bu ölkələr ilə əlaqələrinin inkişafında mühüm rol oynayacaqdır. Bu dövlətlərin nümayəndələri ölkələrində Azərbaycan ilə bağlı problemlərin müzakirəsinə mühüm təsir göstərə bilərlər. Məhz bu baxımdan belə səfərlər gələcəkdə də təşkil olunacaqdır.
A.Mehdiyev onu da əlavə etmişdir ki, BMT Baş Məclisinin gündəliyində Azərbaycan ilə bağlı məsələ də vardır.
Ermənistan-Azərbaycan, Dağlıq Qarabağ münaqişəsi ilə bağlı yeni qətnamə layihəsi mövcuddur. Bu layihənin müzakirəyə çıxarılacağı gözlənilir.