İlin sonuna kimi Türkiyədə Yüksək Səviyyəli Əməkdaşlıq Şurasının toplantısı keçiriləcək
"Baş nazir Rəcəb Tayyib Ərdoğanın səfəri Türkiyənin Azərbaycana böyük önəm verdiyini göstərir və tarixi əhəmiyyət daşıyır". APA-nın məlumatına görə, bu fikirləri keçirdiyi mətbuat konfransında Türkiyənin Azərbaycandakı səfiri Hülusi Kılıç söyləmişdir.
Onun sözlərinə görə, Baş nazir Ərdoğan və Azərbaycan Prezidenti İlham Əliyevin görüşündə ikitərəfli əlaqələr, iqtisadi məsələlər, Dağlıq Qarabağ münaqişəsinin həlli, ticarət və iqtisadi sahədə əlaqələr müzakirə olunub. Ötən il ölkələrimiz arasında ticarət dövriyyəsinin həcmi 2,5 milyard dollara çatmışdı. İlin sonuna kimi ticarət dövriyyəsinin 3 milyard dollara çatacağı proqnozlaşdırılır.
Səfir Hülusi Kılıç bildirib ki, görüşdə ticarət anlaşması ilə bağlı sazişin imza üçün hazırlanması barədə qərar qəbul edilib. Tərəflər həmçinin Türkiyə və Azərbaycan arasında viza məsələsini də müzakirə ediblər. Səfir bildirib ki, Azərbaycanın da tezliklə viza məsələsini həll edəcəyinə ümid edir.
Əldə olunmuş qərara əsasən, ilin sonuna qədər Türkiyədə Yüksək Səviyyəli Əməkdaşlıq Şurasının toplantısı keçiriləcək.
Terrorla bağlı xüsusi müzakirələrin aparıldığını deyən səfir Prezident İlham Əliyevin PKK terror təşkilatı ilə bağlı sərgilədiyi mövqedən razı qaldıqlarını dilə gətirib: "Görüşdə müzakirə edilən önəmli məsələlərdən biri Dağlıq Qarabağ məsələsi idi. Baş nazir Ərdoğana son durumla bağlı məlumatlar verildi. Biz 18 il əvvəl Ermənistanla sərhədi Azərbaycan torpaqlarını işğal etməsinə görə bağladıq. Bu küçə qapısı deyil. Biz istəyirik ki, problem həll olunsun. Türkiyə olaraq hər zaman Azərbaycanın yanındayıq. Türkiyə-Ermənistan probleminin həlli üçün Ermənistanla Azərbaycan arasındakı problemin həlli lazımdır".