İyulun 29-da Naxçıvan Muxtar Respublikası Ali Məclisində dövlət mükafatlarının, habelə Azərbaycan Respublikasının və Naxçıvan MR-in fəxri adlarının təqdim edilməsi mərasimi olmuşdur. 
Ali Məclisin sədri Vasif Talıbov əməyi dövlət tərəfindən layiqincə qiymətləndirilən şəxsləri təbrik etmiş, işlərində uğurlar arzulamışdır. O demişdir ki, Azərbaycan ulu öndərin yolu ilə gedərək inkişaf edir, müstəqilliyimiz möhkəmlənir, ölkəmiz qüdrətlənir. Azərbaycanın tərkib hissəsi olan Naxçıvan Muxtar Respublikası da hərtərəfli inkişaf dövrünü yaşayır. Bu sahədə xüsusilə fərqlənənlərin əməyinin yüksək qiymətləndirilməsi dövlətimizin insan amilinə, çəkilən zəhmətə verdiyi dəyərin ifadəsidir.
Sonra Ali Məclisin sədri orden və medalları, fəxri adların döş nişanlarını və vəsiqələrini təqdim etmişdir.
Təltif olunanlardan Şamı Abdullayev, Nazim Nəbiyev, Xədicə Qazıyeva, Kərəm Mustafayev, İdris Məhərrəmov, Ehtibar İsmayılov, Hacırəddin Mehbalıyev, Roza Mustafayeva, Mirkamal Seyidov və Həmzə Sadiqov əməyinə verilən yüksək qiymətə görə dərin minnətdarlıqlarını bildirmiş, bundan sonra da dövlətimizin tərəqqisi naminə səylə çalışacaqlarını vurğulamışlar.