"Əli günahsız insanların qanına batan, dövlət idarəçiliyində heç bir təcrübəsi olmayan, sadəcə terrorun çiynində hakimiyyətə gələn Sarkisyanın bəyanatı onun kimliyini, xislətini açıqlayır, ermənilərin niyyətlərindən xəbər verir". Bu fikirləri yap.org.az saytına açıqlamasında işğal altında olan Qubadlı və Zəngilan rayonlarının seçicilərinin Milli Məclisdəki təmsilçisi, millət vəkili İmamverdi İsmayılov deyib.
İ.İsmayılov bildirib ki, S.Sarkisyan ermənilərin tarixən terrorla məşğul olduğunu rəsmən etiraf edib. Millət vəkilinin sözlərinə görə, Ermənistan prezidentinin fikirləri bir daha göstərir ki, ermənilər tarixən Azərbaycan və Türkiyə torpaqlarına göz dikiblər, bu torpaqlara qarşı işğal siyasəti yürüdüblər:
"Azərbaycan Prezidenti İlham Əliyevlə Türkiyənin Baş naziri Rəcəb Tayyib Ərdoğanın birgə keçirilən mətbuat konfransında da ermənilərin xalqımıza qarşı genosid siyasəti həyata keçirdiyi bir daha səsləndirildi. Mənə elə gəlir ki, Azərbaycanın bugünkü gücündən, qüdrətindən, ölkə Prezidentimizin apardığı uğurlu xarici-daxili siyasətin nəticələrindən və bununla yanaşı, işğal altında olan torpaqlarımızı azad etmək əzmində olan Azərbaycan Ordusunun qüdrətindən qorxan Sarkisyan artıq bu cür nağıllar vasitəsilə ermənilərdəki ruh düşkünlüyünün qarşısını almağa çalışır. Amma özü də başa düşür ki, çıxış yolu yoxdur, Azərbaycan öz torpaqlarını gec-tez işğaldan azad edəcək".