Türkiyənin Baş naziri Rəcəb Tayyib Ərdoğanın Azərbaycana səfəri zamanı ölkə başçılarının görüşləri, bəyanatları, təkbətək və nümayəndə heyətlərinin iştirakı ilə ikitərəfli münasibətlərin müzakirəsi bir daha göstərdi ki, iki dövlətin arasına girmək olmaz. Bu fikri cümə axşamı Trend-ə Prezident Administrasiyasının İctimai-siyasi məsələlər şöbəsinin müdiri Əli Həsənov Baş nazir Ərdoğanın səfərinin yekununu şərh edərkən demişdir.
"Azərbaycan və Türkiyə dünyada analoqu olmayan müttəfiqdirlər və onların müttəfiqliyi qarşılıqlı maraqlara, qarşılıqlı mənafelərə, xalqlarımızın tale birliyinə söykənir. Onların müttəfiqliyi həm regionda, həm dünyada dövlət maraqlarımızın tam üst-üstə düşməsinə söykənir". Prezident Administrasiyasının rəsmisi qeyd etmişdir ki, uzun müddətdir Azərbaycan və Türkiyə münasibətlərini təftiş etməyə çalışan müxtəlif "opponentlər" mövcud idi:
"Düşünürəm ki, onlar dünənki görüşdən sonra artıq özlərinin "arqument"lərinin tam əsassız olduğunun şahidi olacaqlar. Azərbaycan və Türkiyə bundan sonra da dünya, region siyasətində, beynəlxalq münasibətlərdə, enerji, təhlükəsizlik, terrorizmə qarşı mübarizə siyasətində qarşılıqlı maraqların üzərində qurulmuş iqtisadi-siyasi, ticarət münasibətlərində bir daha ortaq, birgə, strateji müttəfiqlik maraqlarını təsdiq etdilər".