Böyük Britaniya Parlamentinin İcmalar Palatasının üzvü, Mühafizəkarlar Partiyasından olan Azərbaycanın dostları qrupunun sədr müavini Kristofer Pinçerin başçılığı ilə Azərbaycanda səfərdə olan nümayəndə heyəti iyulun 26-da Milli Məclisin sədri Oqtay Əsədovla görüşmüşdür. 
Milli Məclisin sədri bu cür görüşlərin ölkələr arasında münasibətlərin daha da inkişaf etdirilməsi, Azərbaycan həqiqətlərinin, xüsusən də Dağlıq Qarabağ münaqişəsinin əsl mahiyyəti və nəticələri barədə məlumatların Böyük Britaniya ictimaiyyətinə çatdırılmasında əhəmiyyətini vurğulamışdır.
O.Əsədov demişdir ki, Azərbaycanın iqtisadi uğurları bütün regiona təsir etməkdədir. Bununla yanaşı, Dağlıq Qarabağ münaqişəsinin həll olunması bölgənin hərtərəfli tərəqqisinə böyük maneçilik törədir.
Kristofer Pinçer parlamentlər səviyyəsində əlaqələrin inkişafının əhəmiyyətini vurğulamışdır. O demişdir ki, Böyük Britaniya Cənubi Qafqazın bu bölgəsi ilə əməkdaşlığın dərinləşməsində maraqlıdır və bölgədə baş verən proseslər diqqətlə izlənilir. Səfərimizin məqsədi Azərbaycan ilə Böyük Britaniya arasında siyasi və iqtisadi əlaqələri daha da inkişaf etdirmək, Dağlıq Qarabağ münaqişəsi ilə bağlı həqiqətlərlə daha yaxından tanış olmaqdır.
Söhbətdə parlamentlərarası əlaqələrin inkişafı, Dağlıq Qarabağ münaqişəsinin həlli yolları, regiondakı ictimai-siyasi vəziyyət barədə fikir mübadiləsi aparılmışdır.