Xarici İşlər Nazirliyinin mətbuat xidmətindən bildirmişlər ki, Azərbaycan Respublikasının İspaniya Krallığındakı səfiri Altay Əfəndiyev etimadnaməsini İspaniya Kralı I Xuan Karlosa təqdim etmişdir.
Mərasim zamanı səfir Altay Əfəndiyev və Kral I Xuan Karlos arasında ikitərəfli görüş keçirilmişdir.
Səfir A.Əfəndiyev Azərbaycan Respublikası ilə İspaniya Krallığı arasında mövcud olan mehriban və açıq münasibətləri qeyd etmiş, ölkəmizin iqtisadi inkişaf potensialı və İspaniyanın texnoloji imkanları nəzərə alınmaqla qarşılıqlı əməkdaşlığın geniş perspektivləri olduğunu vurğulamışdır. A.Əfəndiyev İspaniya Krallığının Dağlıq Qarabağ münaqişəsinin Azərbaycanın ərazi bütövlüyü çərçivəsində həlli variantını dəstəklədiyinə görə təşəkkürünü bildirmişdir.
Görüşdə Azərbaycan-İspaniya münasibətlərinin inkişafına təkan verən amil kimi dövlətlərimizin başçıları səviyyəsində ikitərəfli rəsmi səfərlərin təşkilinin vacibliyi vurğulanmışdır.
Görüşün sonunda Kral I Xuan Karlos səfirdən Azərbaycan Prezidentinə salamlarını və xoş arzularını çatdırmağı xahiş etmişdir.
AzərTAc