Azərbaycan Respublikası Mərkəzi Seçki Komissiyasının (MSK) sədri Məzahir Pənahov iyulun 21-dən 25-dək Latviya Mərkəzi Seçki Komissiyasının sədri Arnis Simdarsın dəvəti ilə Riqada səfərdə olacaqdır.
MSK-nın mətbuat xidmətindən bildirmişlər ki, səfərin məqsədi iyulun 23-də Latviyada keçiriləcək referendumda müşahidəçilik etməkdir.
M.Pənahovun Latviya Mərkəzi Seçki Komissiyasının sədri və digər rəsmi şəxslərlə görüşləri nəzərdə tutulmuşdur. Görüşlərdə iki ölkənin seçki qurumları arasındakı münasibətlər və qarşılıqlı maraq doğuran digər məsələlər müzakirə ediləcəkdir.
Səfərdə MSK sədrini Mərkəzi Seçki Komissiyası Katibliyinin müdiri Rövzət Qasımov müşayiət edəcəkdir.
AzərTAc{nl}