"Azərbaycanın BMT Təhlükəsizlik Şurasına qeyri-daimi üzvlüyü dövründə ölkənin bu strukturda müzakirə etmək üçün irəli sürəcəyi məsələlərə dəqiq baxışı, dəqiq proqramı və təklifləri var". Bunu Azərbaycanın BMT-dəki daimi nümayəndəsi, səfir Aqşin Mehdiyev bildirib.
Səfir qeyd edib ki, Təhlükəsizlik Şurası BMT-nin ali orqanıdır və bu orqanın üzvü olmaq istənilən ölkə üçün hər şeydən əvvəl nüfuzlu hadisədir: "BMT Təhlükəsizlik Şurasının üzvü olan ölkələr praktiki olaraq hazırda dünya ictimaiyyətini narahat edən ən aktual məsələlərin həllində, eləcə də bu gün dünyada mövcud olan qaynar nöqtələrdəki, Liviya və digər ölkələrdəki mövzular üzrə müzakirələrdə iştirak edirlər. Mən irəliyə getmək və Azərbaycanın BMT Təhlükəsizlik Şurasına qeyri-daimi üzv olacağı halda nə edib-etməyəcəyi barədə indidən danışmaq istəmirəm. Yalnız onu deyə bilərəm ki, Azərbaycanın bu strukturda müzakirə etmək üçün irəli sürəcəyi məsələlərə dəqiq baxışı, dəqiq proqramı və təklifləri var. Əgər Təhlükəsizlik Şurasının üzvü olsaq, hesab edirəm ki, bizim bu strukturda müzakirə olunmaq üçün irəli sürəcəyimiz çoxlu məsələlər var".
Xatırladaq ki, Azərbaycan 2012-ci il üçün BMT Təhlükəsizlik Şurasına qeyri-daimi üzvlüyə öz namizədliyini irəli sürüb. Seçkilər bu ilin payızında keçiriləcək.