Avropa İttifaqı Cənubi Qafqazda münaqişələrin həllinə kömək məqsədi ilə bu regiona yeni xüsusi nümayəndəsini göndərəcəkdir.
AzərTAc xarici saytlara istinadla xəbər verir ki, bunu Aİ-nin Avropa xarici siyasət xidmətinin Şərq tərəfdaşlığı məsələləri üzrə idarəedici direktoru Miroslav Layçak bildirmişdir.
M.Layçak demişdir ki, Avropa İttifaqı Dağlıq Qarabağ münaqişəsinin həlli prosesində rolunu daha da artırmaq istəyir. Çünki münaqişənin sülh yolu ilə həlli Aİ-nin strateji marağına cavab verir və regionda iqtisadi sabitliyin təmin olunmasına zəmin yaradır.
İdarəedici direktor onu da bildirmişdir ki, münaqişənin həlli məsələsində Aİ-nin nə iş görə biləcəyi barədə ATƏT-in Minsk qrupu ilə müzakirələr aparılır. Lakin bu suala cavab Minsk qrupu ilə müzakirələrdən deyil, danışıqlardan asılıdır: "Brüssel Avropa standartlarına uyğun olaraq müəyyən təkliflərini təqdim etməklə tərəflər arasında dialoqa təkan verə bilər. Lakin bu addımlar danışıqlar prosesinin dinamikasından asılı olacaqdır. Aİ-nin məsələnin həllində fəallığının sübutu isə odur ki, Xarici siyasət üzrə ali komissar Ketrin Eşton Cənubi Qafqazda münaqişələrin həllinə kömək üçün yeni xüsusi nümayəndəsini göndərəcəkdir", - deyə M.Layçak bildirmişdir.