Rusiyanın xarici işlər naziri Sergey Lavrov Vaşinqtonda üçgünlük səfərdədir. AzərTAc Rusiyanın kütləvi informasiya vasitələrinə istinadən bildirir ki, Rusiya XİN başçısı səfər çərçivəsində Amerika rəhbərliyi ilə görüşlər keçirəcəkdir. Görüşlərdə əsasən Ermənistan-Azərbaycan, Dağlıq Qarabağ münaqişəsinə dair məsələ müzakirə olunacaqdır. Sergey Lavrovun Ermənistan-Azərbaycan, Dağlıq Qarabağ münaqişəsinin nizamlanması üçün son təklifləri ABŞ tərəfinə təqdim edəcəyi də gözlənilir. 
Prezident İlham Əliyevin Azərbaycanın müstəqilliyinin 20-ci və Silahlı Qüvvələrin 93-cü ildönümləri münasibətilə Bakıda keçirilən təntənəli hərbi paraddakı çıxışı zamanı dediyi "Azərbaycanın ərazi bütövlüyü istənilən yolla bərpa ediləcəkdir" fikri beynəlxalq aləmin diqqətini Ermənistan-Azərbaycan, Dağlıq Qarabağ münaqişəsinin həllinə yönəltməyə səbəb olmuşdur. Münaqişənin tezliklə həll olunması üçün dəstək nümayiş etdirən rəsmi Vaşinqtona Rusiya da hərtərəfli kömək göstərəcəyini bildirmişdir.
Xatırladaq ki, Sergey Lavrov ötən həftə Bakı və İrəvana qısamüddətli səfər etmiş və Azərbaycan və Ermənistan prezidentlərinə Rusiya dövlət başçısı Dmitri Medvedevin Qarabağ münaqişəsinin tənzimlənməsi üzrə təkliflərini çatdırmışdır.

AzərTAc