ATƏT həlli uzanan münaqişələrin, o cümlədən Dağlıq Qarabağ probleminin tənzimlənməsinə dair səylərini davam etdirəcəkdir. 
ATƏT-in fəaliyyətdə olan sədri, Litvanın xarici işlər naziri Audronyus Ajubalis bu fikri Belqradda, ATƏT-in Parlament Assambleyasının ilk sessiyasındakı çıxışında söyləmişdir. O daha sonra bildirmişdir ki, təşkilat Dağlıq Qarabağ ətrafında münaqişənin tərəfləri arasında etimadın möhkəmlənməsi üçün də tədbirlər görəcək, bununla müsbət nəticələr əldə edilməsinə şərait yaradacaqdır. Ajubalis demişdir: "ATƏT Dağlıq Qarabağ ətrafında gərginliyin azaldılması üçün öz səylərini davam etdirmək, o cümlədən etimad yaradılması üzrə tədbirlər görmək niyyətindədir".
O qeyd etmişdir ki, ATƏT ümumiyyətlə münaqişə zonalarında öz fəaliyyətində uğur qazanmağa çalışır. Ajubalis 2008-ci ilin avqust ayında baş vermiş müharibədən sonra Gürcüstanda yaranmış vəziyyətlə əlaqədar demişdir: "Cenevrə diskussiyalarında irəliləyiş ləng gedir, lakin etimadın möhkəmlədilməsi üçün göstərilən səylər müsbət nəticələr əldə edilməsinə kömək edəcəkdir. Əlaqələr davam etdirilməlidir".

Nigar HÜSEYNOVA AzərTAc-ın xüsusi müxbiri
Vilnüs